Kompaniya Ubisoft o‘zining flagman brendi Assassin’s Creed uchun yangi rahbariyat jamoasi tayinlanganini e’lon qildi. Endi franchayza boshqaruvi Vantage Studios nomli sho‘ba kompaniyaga o‘tadi. Ushbu studiyaga seriyaning eng muvaffaqiyatli qismlarini yaratishda qatnashgan tajribali mutaxassislar rahbarlik qilmoqda.
Assassin’s Creed rivojlanishi bo‘yicha rahbar etib Martin Shelling tayinlandi. U avval Ubisoft’da bosh ishlab chiqarish direktori lavozimida ishlagan va Assassin’s Creed: Revelations, Assassin’s Creed IV: Black Flag, Assassin’s Creed Origins hamda Assassin’s Creed Valhalla kabi loyihalarni nazorat qilgan. Endi u butun seriya uchun uzoq muddatli rivojlanish strategiyasini shakllantirish bilan shug‘ullanadi.
Kontent bo‘yicha rahbar — ya’ni brendning ijodiy direktori lavozimini Jan Gesdon egalladi. U studiya faxriysi bo‘lib, ilk Assassin’s Creed ustida ishlagan, shuningdek Assassin’s Creed IV: Black Flag va Assassin’s Creed Origins ijodiy jamoasiga rahbarlik qilgan. Gesdon kelajakdagi loyihalarning ijodiy yo‘nalishiga mas’ul bo‘ladi va “seriya DNK”sini saqlab qolishga e’tibor qaratadi.
Ishlab chiqarish jarayonlarini takomillashtirish bo‘yicha rahbar etib Fransua de Billi tayinlandi. U ilgari Assassin’s Creed Valhalla va Assassin’s Creed Origins loyihalarida ishlab chiqarish direktori sifatida faoliyat yuritgan. Uning asosiy vazifasi — ish jarayonlarini optimallashtirish va ishlab chiqish samaradorligini oshirish.
Eng qiziqarli yangiliklar GameMakon da…