Yakuniy baho: 9/10 — “Ajoyib”
Assassin’s Creed — bu shunchaki o‘yinlar seriyasi emas, balki virtual olamdagi haqiqiy tarixiy sayohatdir. 2007-yildan buyon Ubisoft bizni turli davrlarga — Salib yurishlaridan tortib, Qadimgi Misr va Vikinglar davrigacha olib bordi. Ushbu franshiza o‘zining stels (xufyona harakatlanish) mexanikasi, parkur tizimi va tarixiy shaxslar bilan uchrashuvlari orqali dunyoda millionlab muxlislarni orttirdi.
Franshiza o‘z taraqqiyoti davomida ikki katta davrga bo‘lindi, shu bilan birga o’yin muxlislari ham ikkiga bo’lingan:
- Klassik davr – Asosiy e’tibor yashirin qotilliklar va ijtimoiy stelsga qaratilgan (Assassin’s creed 1 dan Assassin’s creed Syndicate gacha).
- RPG davri – Ochiq dunyo, personajni rivojlantirish va masshtabli janglarga urg‘u berilgan (Assassin’s creed Origins dan Assassin’s creed Shadows gacha).
Afzalligi
Betakror tarixiy atmosfera – Har bir qism o‘yinchini o‘tmishga — Uyg‘onish davri Italiyasi, Qadimgi Misr yoki Vikinglar Angliyasi bo’lmasa Quyosh chiqar mamlakat Yaponiyaga sayohat qildiradi. Qariyb dengizi, Amerika Qo’shma Shtatlari, Konstantinopol, Gretsiya shaharlaridan tortib tarixiy binolar va muhitni yaratishda Ubisoft o‘ziga xos mahoratga ega. Bu yo’nalishni yetakchi liderlaridan desak adashmagan bo’lamiz!
Parkur va harakat erkinligi – Baland binolarga chiqish, tomlar bo‘ylab yugurish va atrofni o‘rganish (exploration) mexanikasi bu seriyaning “tashrif qog‘ozi” hisoblanadi. Hech qaysi boshqa o‘yinda bunday erkinlik tizimi mukammal darajada yaratilmagan. Parkur olamining mutloq qirollaridan biri.
Tarixiy shaxslar bilan tanishuv – Leonardo da Vinchi, Suqrot, Kleopatra yoki Benjamin Franklin (100$ lik AQSh pul birligida rasmi ko’rsatilgan shaxs) kabi tarixiy shaxslar bilan muloqot qilish va ular bergan topshiriqlarni bajarish o‘yinga o‘zgacha zavq bag‘ishlaydi.
O‘yin janrining evolyutsiyasi – Seriya bir joyda to‘xtab qolmaydi. Oddiy stels-ekshndan boshlangan loyiha bugungi kunda yuzlab soatlik tarkibga ega ulkan RPG darajasiga yetdi. Bu o‘yinchilarga keng tanlov imkoniyatini beradi.
Dizayn va vizual sifat – Har bir yangi qism grafik jihatdan o‘z davrining eng yuqori standartlariga javob beradi. Peyzajlar va manzaralar shunchalik chiroyliki, o‘yin ichida “Foto-rejim”dan chiqishni xohlamay qolasiz.
Kamchiliklari
Konveyer uslubi – Ubisoft o‘yinlarni juda tez (deyarli har yili) chiqarishga harakat qilgani sababli, ba’zi qismlarda innovatsiyalar yetishmaydi. Bu esa o‘yinchilarda “bir xillik” (repetitiveness) hissini uyg‘otadi.
Syujetning chalkashligi – Zamonaviy dunyo (Abstergo) va qadimgi davr voqealari o‘rtasidagi bog‘liqlik yildan-yilga murakkablashib bormoqda. Bu esa yangi o‘yinchilar uchun voqealar rivojini tushunishni qiyinlashtiradi.
Realizmdan uzoqlashish – So‘nggi qismlarda tarixiy realizmdan ko‘ra mifologiya va fantastik elementlarga (maxluqlar, sehrli qurollar) ko‘p urg‘u berilayotgani “eski maktab” muxlislarining e’tirozlariga sabab bo‘lmoqda. Bu kamchilik ham bahsli, sababi real yoki mifologik ikkalasini ham o’z muxlislari bor.
Katta xaritalar va “Grind” – Yangi RPG qismlarida (Valhalla, Odyssey) xaritalar haddan tashqari keng va ko‘plab qo‘shimcha topshiriqlar bilan to‘ldirilgan. Bu asosiy syujet dinamikasini biroz pasaytirishi mumkin. Ammo shuni ta’kidlash kerakki, “grind” tizimi ko‘proq havaskorlar uchun: agar o‘yinni tartib bilan, shoshmasdan va har bir detalni o‘rganib o‘ynasangiz, jarayon juda qiziqarli kechadi.
Assassin’s creed o‘yin sanoatidagi eng barqaror loyihalardan biri hisoblanadi. Garchi har bir qismning o‘ziga xos kamchiliklari bo‘lsa-da, franshiza hech qachon sifat darajasini ma’lum bir chiziqdan pastga tushirmagan.
Yakuniy xulosa
Assassin’s Creed — bu sarguzasht, tarix va zamonaviy texnologiyalarning uyg‘unligi. Agar siz keng ko‘lamli ochiq dunyo va qiziqarli syujet ishqibozi bo‘lsangiz, bu seriya siz uchun o‘yinlar olamidagi “oltin standart” bo‘lib qoladi.
Assassin’s Creed seriyasi eng zo’r o’yin seriyalaridan biri!