Daniel Vávra — ilk Mafia va ikki qismli Kingdom Come: Deliverance yaratuvchisi — endi Warhorse Studios’da yangi o‘yin ishlab chiqilishiga rahbarlik qilmaydi. CzechCrunch jurnali xabariga ko‘ra, u mashhur o‘yin asosida film yoki serial yaratishga e’tibor qaratadi. Vávra studiya tarkibida qoladi, biroq ofisda kamroq ko‘rinadi.
Avvalroq Warhorse brendni o‘yinlardan tashqariga kengaytirish — komikslar, konsertlar va hatto turistik loyihalar yo‘nalishida rejalarini ochiq aytgan edi. Endi esa studiya kino tomon jiddiy qadam tashlamoqda: ssenariyning ishchi varianti tayyor, kino sanoati vakillari bilan muzokaralar davom etmoqda. Studiya rahbari Martin Frývaldský ta’kidlashicha, ular filmni o‘z tasavvurlariga mos tarzda yaratmoqchi va shunchaki huquqlarni sotish bilan cheklanib qolmaydi.
Hozircha syujet tafsilotlari oshkor qilinmagan: ekranizatsiya o‘yin voqealarini takrorlashi yoki Kingdom Come olamida yangi hikoya taklif qilishi mumkin. Loyiha to‘liq metrajli film bo‘ladimi yoki serialmi — bu ham aniq emas, biroq studiya rahbari ko‘proq film formatini tilga olgan.
Frývaldský Vávraning ijodiy direktor lavozimini tark etishi studiyadan butunlay ketishini anglatmasligini ham qayd etdi. Uning so‘zlariga ko‘ra, Vávra kengroq ma’noda hamon Warhorse’ning bir qismi bo‘lib qoladi.
Hozirda Warhorse Studios rahbariyat jamoasida Martin Frývaldský, Martin Klíma, Viktor Höšl, Martin Štys, Viktor Bokan va Prokop Jirsa faoliyat yuritmoqda. Vávraning o‘zi esa yangi vazifalari haqida hali izoh bermagan.
Ko’ramiz qanday yangiliklar bo’lar ekan kelgusida.
Eng qiziqarli yangiliklar GameMakon da…